Përgjatë Kanionit do të keni mundësinë të shihni disa shpella ku spikat ajo e Pëllumbave. Një shpellë 160 metra e gjatë dhe 3 metra e lartë që mbart vlera të paçmueshme falë mbetjeve të gjetura që i përkasin periudhës neolitike. Atmosfera e krijuar nga lumi gurgullues, gurët e bardhë, ujërat termale që burojnë rrëzë shpellave dhe bimët që kacavirren nëpër shpate është tejet mbresëlënëse dhe do t'ju bëjë të doni ta zgjasni sa më shumë qëndrimin në këtë vend.