Përmeti, një qytet i pasur në bukuri natyrore e jo vetëm, ndodhet në pjesën juglindore të Shqipërisë. Është i njohur për monumentet e tij kulturore, vendet arkeologjike, figurat historike, muzikën popullore dhe kultivimin e trëndafilave. Këtu, besime të ndryshme kanë bashkëjetuar në paqe për shekuj me radhë dhe qyteti bashkë me rrethinat e tij zotërojnë disa nga objektet fetare më të bukura të vendit, të cilat mbartin vlera të paçmueshme kulturore dhe historike. Kisha e Shën Kollit, Kisha e Shën Marisë, Kisha e Shën e Prëmtes, Teqeja e Baba Aliut, Teqeja e Frashërit janë të gjitha shembuj të tolerancës fetare. Përmeti është gjithashtu një vend i rëndësishëm për të mësuar mbi historinë e Shqipërisë. Ky qytet është padyshim vatra kryesore e Rilindjes Kombëtare Shqiptare, lëvizjes politike, shoqërore e kulturore për çlirimin e vendit nga pushtimet e huaja, bashkimin e trojeve shqiptare dhe zhvillimin e arsimit dhe kulturës vendase. Kontributet kulturore dhe veprimtaria e tre vëllezërve Abdyl, Naim dhe Sami Frashëri, të lindur në fshatin Frashër të Përmetit, janë padyshim disa nga më të vlefshmet dhe më të rëndësishmet gjatë kësaj lëvizjeje, që filloi në mesin e shekullit XIX deri në vitin 1912. Të vizitosh Përmetin është një zhytje mbresëlënëse në natyrë, art dhe kulturë.